كلمة من عندي وبيت من عندك

[منى الحازمي]

×× النصـــيب ××


أبد .. ما جيت ابارك لك ولكن جيت باوصّيك

على اللي ناوي ٍ تدخل بها الليلـه .. مُعذّبْتـي

ترى لولا الظروف اللي عطتْك وحدّت ماحاكيك

قسم بالله ما تدخل عليهـا لـو علـى رْقبْتـي

ولكنّ النصيب اقوى ولا ادري ويش اسوّي فيك

نعم .. صارت معزّبتك .. ولا صارت معزّبْتي

كذا شاءت بنا الأقدار تحرمني لجـل تعطيـك

كذا لازم عشان تفوز إنت .. أخسر بتجربْتـي

تراها غاليه جـداً .. وتكفـى .. والله يخليـك

تدللهـا .. تدلعهـا .. تنسّيـهـا مصاحبْـتـي

أنا من كثر ما اغليها أحس اني بديـت اغليـك

ولا تسـأل بأيّـة حـق ولا ّ وش مناسبْـتـي

لإنك لو بتسألني بتسمع شـيء مـا يرضيـك

لذا ياخـوي لا تسـأل ولا تسمـع لأجوبْتـي

أبيك تحطها في داخل عيونـك وبيـن ايديـك

وهي دلوعه اعتـادت علـى كثـرة مداعبْتـي

فداعبها شوي شـوي حتـى تشتهـي طاريـك

وشاغبها إلين تقـول لـك: بطّـل مشاغبْتـي

واذا هي مالها خلقك..ولا تضحك ولا تسلّيـك

تحمّلها وإسألهـا: يـا عمـري ليـه عصّبْتـي

وبالك اسمع انّك يوم تضربها وهـي تشكيـك

ما يحتاج اورّي لك بفـن الضـرب موهبْتـي

صحيح انك بتملكهـا ومعـك العقـد بالتمليـك


وانا عارف حدود الله ومـن حقـك معاقبْتـي

ولكن قلّها المجنـون وصّانـي وهـو يعنيـك

يقول انّـه بينتظـرك ولـو شيّـب وشيّبْتـي

وانا مجنونها اللي ما نساها وانت مـا يمديـك

تغطّي ذكرياتي في هواها.. وربْـع تجربْتـي

أحس اني تماديت بكلامي.. والغضب حاديـك

ولو انّك في مكاني ما تفكّـر فـي محاسبْتـي

كفاك اني تركت الليله اشغالي عشـان اجيـك

دخلت القاعه برجلي ولا ادري ويش عاقبْتـي

وانا ما جيت اخرّب عرسك الليلـه ولا أذّيـك

أنا جيتك عشان اخاطبـك واسمـع مخاطبْتـي

توصّى..وانتبه..واحرص عليهـا والله يهنّيـك

ترى كل الكلام اللي طلَع من ضيقـيَ وكبْتـي

ولكن ما قدرت انّي أقوله وانـت مـا يخفيـك

أخاف انّـي إذا قلتـه تقـوم وتقطـع رْقبْتـي

الحلم

[خـــالد الســـالم]

الحلم



الحلم يجمعني بكم كل ليلة .......... يطوي بساط البعد مابيننا البين

صارت حلوم الليل عندي وسيلة .......... اشوفكم يا أحبابي وانتم بعيدين



مقدار حبي لك عالم فيه ربي .......... ولا الموازين لغرامي ظلومه

لا لا تقارن حب امك بحبي .......... اخاف من عينك تطيح الامومه




الشعر مايبعدك عني ولا اي مخلوق .......... وان غبت يبقى في غيابك حضورة

مثل الشجر مهما رفع هامته فوق .......... يبقى مصيره مرتبط في جذوره




لقيت اسمك على صوتي لقيتك دايم قبالي .......... اشوفك حلم واحلم بك حقيقة يانظر عيني

انا وحدي مشيت الدرب بديت احقق احلامي .......... لقيت اغلى زمن انتي من الدنيا يكفيني




لاجيت ابهرب من عيونك تراجعت .......... وشلون ابهرب والمسافه عيونك

ماهي بكيفك لو عرفت وتشجعت .......... لو قلت اببعد يقصر العلم دونك



خيمت في الدنيا علشان دنياك .......... خليت كل اللي يبيني وجيتك

كنت بعيوني وين مااطالع القاك .......... حتى لو غمضت عيني لقيتك




انا ياكل الغلا ميت فيك .......... مجنون حبك وان ذبحني جنونك

ترى حياتي ياحياتي بها افديك .......... دونك حياتي وش حياتي بدونك




ابصبر الين رب الخلق يجمعني سوا وياك .......... واضمك يادفا عمري ترى حضنك يدفيني

ابسعد لا حصل شوفك وبهنا لا حصل لاماك .......... وانا ادري قربي وقربك يعنيك ويهنيني



الذكرى